2008-02-08 14:24:32
Авьяасын минь тэнгэрт од болон гэрэлтэгч
Хүслийн минь хойморт зул болон асагч
Бодлын минь үзүүрт лаа болон үл бөхөгч
Онгод чиний гэрэл юутай хүчтэй
2008-02-07 19:01:54
Аавын бичдэг шүлэг
Айхтар хачин утгатай
Арван хэдхэн насанд минь
Ахадсан үгтэй
Зэв тогтдоггүй төмөр лоом
Зэвсэг нь ч юмуу,сүлд нь ч юмуу
Зээрийн махтай хуурай цуйван
Хоол нь ч юм шиг ,тахил нь ч юм шиг
Олон нөхөөстэй даавуу майхан
Оромж нь ч юм шиг өргөө нь ч юм шиг
Оорцог толгодын жонштой дэл
Олз нь ч юм шиг гарз нь ч юм шиг
Жаахан согтохоороо л уйлж дуулаад
Жаргасан ч юм шиг зовсон ч юм шиг
Жавартай тэнгэрийн хаяа ширтээд
Залхсан ч юм шиг дасчихсан ч юм шиг
Эвий охин минь гэж дух үнэрлээд
Эцэг минь ч юм шиг бурхан ч юм шиг
Эвгүй аашинд минь зандран хилэгнээд
Эрлэг нь ч юм шиг зарлиг нь ч юм шиг
Биднийгээ үүрээд хорвоог туулахдаа
Бие нь лав зүдэрдэг байхдаа
Бишдийн төлөө гараа сунгахдаа
Сэтгэл нь лав бадардаг байхдаа
Амьдралын шуургыг хормой шуун сөрдөг ч
Ачийнхаа өмнө өвдөг сөхрөн унадаг
Аав минь таныхаа нэгээхэн биед
Арвуулаа бид багтдаг
